ఫ్రీ బస్సు పుణ్యమా అని మంచి గిరాకీ!.. బస్సులోనే కూరగాయల దుకాణం తెరిచిన మహిళ

తెలంగాణలో మహిళలకు ఫ్రీ బస్సు సౌకర్యం కల్పించిన నాటి నుండి ఆర్టీసీ బస్సులో వింతలు విచిత్రాలు చూస్తున్నాం.కాంగ్రెస్ ప్రభుత్వం అధికారంలోకి వచ్చాక మహిళల కోసం ఫ్రీ బస్సు సౌకర్యం కల్పిస్తున్న విషయం తెలిసిందే. ఈ పథకం అమలు నాటి నుంచి బస్సుల్లో సీట్ల కోసం మహిళల కొట్లాటలు, భార్యల సీట్ల కోసం భర్తల తన్నులాటలు చూశాం. ఇటీవలే ఓ మహిళ బస్సులో సీటు దొరకలేదని ఏకంగా డ్రైవర్ సీటునే ఆక్రమించింది. ఇలాంటి ఘటనలు తెలంగాణ ఆర్టీసీ బస్సుల్లో ఎన్నో జరిగాయి. ఈ ఘటనలకు సంబందించిన వీడియోలు సోషల్ మీడియాలో తెగ వైరల్ అయ్యాయి. ఇప్పుడు ఇలాంటి ఘటనే మరొకటి వైరల్ అయ్యింది. ఆర్టీసీ బస్సులో ఓ మహిళ ఏకంగా కూరగాయల వ్యాపారమే మొదలు పెట్టింది.

ఓ పల్లె నుంచి మొదలైన ఆర్టీసీ బస్సులో.. బస్సు నిండా ప్రయాణికులతో ప్రయాణం సజావుగా సాగుతోంది. మార్గమధ్యంలో ఓ కూరగాయలు అమ్మే మహిళ బుట్టలో కూరగాయలతో బస్సు ఎక్కింది. ఇది చూసిన మహిళలు ఆమె చుట్టూ చేరి అడగడంతో బస్సులోనే దుకాణం తెరిచింది. అడిగిన మహిళలకు అక్కడే తూకం వేసి కూరగాయలు అమ్మడం మొదలు పెట్టింది. దీనిని అదే బస్సులో వెళుతున్న ఓ ప్రయాణికులు చిత్రీకరించి సోషల్ మీడియాలో పోస్ట్ చేశాడు. దీంతో ఈ వీడియో నెట్టింట చక్కర్లు కొడుతోంది. దీనిపై నెటిజన్లు స్పందిస్తూ.. కొద్ది రోజుల్లో బస్సుల్లో క్యాంటీన్లు కూడా ఓపెన్ చేస్తారేమో అని, ఏది ఏమైనా మహిళకు మంచి గిరాకీ తగిలిందని, ఈ ఫ్రీ బస్సు కొనసాగినంత కాలం ఆర్టీసీ బస్సుల్లో ఇంకెన్ని విచిత్రాలు చూడాల్సి వస్తుందోనని పలు రకాల కామెంట్లు పెడుతున్నారు.